Tge è l'e-voting?


Las persunas cun dretg da votar voteschan oz a l'urna u per correspundenza. Cun l'e-voting èsi pussaivel da votar er a moda electronica online via smartphone, tablet u computer, e quai da tuttas uras e dapertut.
Per l'e-voting survegnan las votantas ed ils votants per posta in code da segirezza, ensemen cun lur documents da votaziun u d'elecziun. Cun quel s'annunzian els sin la plattafurma dad e-voting da lur chantun. Ussa pon els votar ina giada. Silsuenter vegn lur endataziun memorisada a moda codada ed anonimisada en l'urna electronica. Sulettamain la cumissiun electorala dal chantun po avrir l'urna, la decodar e dumbrar las vuschs.


Segirezza e codaziun end-to-end

Differents mecanissems da segirezza garanteschan che Vossa vusch vegnia transmessa e dumbrada correctamain. Grazia ad ina codaziun end-to-end na pon las "cuvertas da resposta" digitalas da la votaziun ni vegnir avertas ni legidas sin l'apparat da la votanta u dal votant fin a l'avertura da l'urna tras la cumissiun electorala dal chantun.

Independent da l'apparat

Il sistem è utilisabel independentamain da la plattafurma e da l'apparat, tuttina sche quai è in smartphone, in tablet u in computer.

Accessibel senza barrieras

Persunas cun impediments pon votar ed eleger electronicamain senza agid da terzs.

Independent dal lieu e dal temp

Svizras e Svizzers a l'exteriur ed a l'intern dal pajais pon participar ad elecziuns e votaziuns independentamain da lur lieu da dimora (il chantun decida tge gruppas da votantas e votants che pon profitar da l'e-voting).

Evitescha sbagls

In simpel agid per l'utilisaziun evitescha sbagls formals sco respostas nunlegiblas, suttascripziuns mancantas, formulars emplenids a moda fallada u glistas nunvalaivlas en il process da votar e d'eleger.

Spert ed exact

Las vuschs pon vegnir dumbradas a moda sperta ed exacta.

Cussegls per la segirezza

Examinar l'impronta dal certificat

Sche Vus vulais controllar che Vus sajas sin il portal dad e-voting correct ed uffizial, pudais Vus examinar l'impronta dal certificat. Uschia pudais Vus excluder dad esser sin ina pagina manipulada u falsifitgada. Ils certificats vegnan utilisads per garantir l'autenticitad dal webserver adressà e per codar la colliaziun da communicaziun cun il server. Uschia pon ins differenziar paginas-web vardaivlas da falsifitgadas, era sch'ellas vesan or a prima vista sumegliant u tuttina.

Tge fatsch jau, sche mes navigatur inditgescha in'impronta dal certificat fallada?

Vus duessas interrumper il process da votar ed infurmar. il post responsabel dal Chantun (team da support).

Sch'il navigatur inditgescha in'impronta dal certificat fallada, n'èn il navigatur e la plattafurma per vuschar betg colliads directamain. Per il solit na stat l'interrupziun betg en connex cun in abus, mabain è ina mesira da protecziun. Tschertas interpresas interrumpan per exempel en lur raits la colliaziun tranter ils computers da lur collavuraturs e las plattafurmas d'internet per filtrar datas nuschaivlas en il traffic da datas. Era programs per la protecziun cunter virus pon vegnir utilisads en questa moda ed esser configurads correspundentamain. Sche votants suspectan che lur vusch pudess vegnir legida a moda abusiva, èsi il meglier d'interrumper il process da vuschar e vuschar cun in auter computer u per correspundenza.

Stizzar la cronologia dal navigatur

Sche Vus vulais far la segira ch'i n'è betg pussaivel da trair eventualas conclusiuns davart Vossas votaziuns ed elecziuns sin l'apparat che Vus avais utilisà (computer, tablet, smartphone), cussegliain nus a Vus da svidar il cache dal navigatur suenter mintga votaziun/elecziun. Cliccai sutvart sin il navigatur che Vus utilisais per vegnir a l'instrucziun co stizzar la cronologia dal navigatur.

Utilisar in modus dal navigatur senza add-ons

Sco ulteriura mesira da segirezza recumandain nus a Vus d'utilisar in modus dal navigatur che supprima sco standard add-ons. Tar Chrome e Microsoft Edge è quai il modus "Inkognito", tar l'Internet Explorer "InPrivate" e tar Safari il modus da navigar privat. Vus pudais era verifitgar ed eventualmain deactivar manualmain ils add-ons e las extensiuns dal navigatur.

Videos davart la segirezza

Differents mecanissems integrads e mesiras spezialas da la tecnica da segirtad sco era mesiras criptograficas procuran che la segirezza e la protecziun da datas sajan garantidas.

Uschia vegn garantì il secret da votaziun

Uschia verifitgesch jau mia vusch en l'e-voting

Uschia pon ins verifitgar resultats da l'e-voting e dumbrar anc ina giada las vuschs

Quai signifitga che tant las votantas ed ils votants sco era las autoritads electoralas pon examinar da tut temp che las vuschs entradas èn vegnidas memorisadas endretg e betg manipuladas.
Sutvart chattais Vus ina selecziun da mecanissems da segirezza:


  • Verifitgabladad

    Verifitgabladad individuala vul dir che mintga votanta sezza e mintga votant sez po verifitgar che sia vusch è vegnida messa en l'urna electronica a moda correcta e senza vegnir manipulada.


    Verifitgabladad universala vul dir che la cumissiun electorala po verifitgar, cura che l'urna vegn averta che quella e ses cuntegn n'èn betg vegnids manipulads.
  • Codaziun end-to-end

    Las vuschs èn codadas da tut temp a partir dal mument che la votanta u il votant dat giu ella fin la dumbraziun.

  • Codaziun da las datas sin il server

    Sin ils servers da La Posta certifitgads da l'ISO e dal TÜV vegnan archivadas las vuschs codadas. Sin ils sistems n'èn mai memorisads il num u l'adressa da la votanta u dal votant.

  • La vusch na po betg vegnir attribuida ad ina votanta u in votant

    Ina vusch entrada na po ni avant ni suenter la dumbraziun vegnir attribuida ad ina tscherta votanta u ad in tschert votant, cunquai ch'ils registers electorals dal sistem dad e-voting vegnan anonimisads dal Chantun gia en la preparaziun e suenter la votaziun vegnan las vuschs anc separadas da l'attest da votar.

  • Illustration Geburtsjahr

    Endataziun da l'onn da naschientscha

    Ultra dals codes d'entrada vegn la votanta u il votant supplitgà en tscherts chantuns d'endatar per s'annunziar in'ulteriura caracteristica distinctiva, sco per exempel ses onn da naschientscha. L'onn da naschientscha na figurescha betg sin l'attest da votar e procura uschia per in'ulteriura segirezza.

  • Codes sin palpiri

    Ils documents d'elecziun cun ils differents codes criptografics per l'e-voting survegn ins vinavant fisicamain per posta. La spediziun separada dals codes per posta è in ulteriur obstachel impurtant per evitar abus.

Co votesch jau electronicamain?


Vus survegnis ensemen cun Voss documents d'elecziun ils codes necessaris per la votaziun. Là chattais Vus era l'URL dal portal d'elecziun e da votaziun che Voss chantun utilisescha.
Quatter differents codes defineschan il process: il code d'inizialisaziun, ils codes da controlla, il code da conferma ed il code da finalisaziun.


Il triangul che marchescha il code d'inizialisaziun.

Code d'inizialisaziun

Il code d'inizialisaziun (segnà cun in TRIANGUL) consista d'ina retscha da cifras e bustabs che sa chatta sin Voss attest da votar. Vus stuais endatar il code d'inizialisaziun sco era Voss onn da naschientscha sin la pagina da partenza dal portal per As identifitgar e per cumenzar cun il process da votaziun.

Il quadrangul che marchescha il code da verificaziun.

Codes da controlla

Ils codes da controlla segnads cun in DIAMANT pussibiliteschan l'uschenumnada verifitgabladad individuala.
Tar ils codes da controlla sa tracti d'ina retscha da cifras che vegn mussada sin il monitur en il pass 3 "Verifitgar e consegnar". Cumparegliai ils codes da controlla inditgads cun quels sin Voss attest da votar. Sch'ils codes da controlla inditgads correspundan a quels sin l'attest da votar, savais Vus che Vossa vusch – che cuntegna Vossa selecziun – è vegnida sigillada e transmessa correctamain.

Il pentagon che marchescha il code da conferma.

Code da conferma

Il code da conferma è segnà cun in PENTAGON. Sch'ils codes da controlla inditgads en il pass 3 "Verifitgar e consegnar" èn corrects, stuais Vus endatar il code da conferma per metter Vossa vusch en l'urna electronica. Sche Vus n'endatais betg Voss code da conferma, na vegn Vossa vusch betg messa en l'urna electronica. En quest cas pudais Vus dar giu Vossa vusch anc adina per correspundenza u a l'urna.

La staila che marchescha il code da finalisaziun.

Code da finalisaziun

Il code da finalisaziun è segnà cun ina STAILA sin Voss attest da votar. Cun il code da finalisaziun pudais Vus controllar en il pass 4 "Consegnà la vusch", sch'il process da votaziun è vegnì terminà cun success. Sch'il code da finalisaziun correspunda al code inditgà, è Vossa vusch vegnida messa en l'urna electronica.

Demo

Il sistem da demo da La Posta na stat per il mument betg a disposiziun. Il sistem da demo vegn reactivà, uschespert che las errurs chattadas il mars èn eliminadas. Ulteriuras infurmaziuns en la communicaziun a las medias dals 29-3.

Transparenza

La Posta è persvadida che sulettamain ina soluziun dad e-voting transparenta e politicamain neutrala po avair success a pli lunga vista. Perquai publitgescha La Posta in tschert dumber da documents e concepts.

Transparenza e publicaziuns Code da funtauna

Chantuns partenaris

Ils suandants chantuns utiliseschan gia nossa soluziun

Friburg

Vopna dal chantun da Friburg

A Friburg pon Svizras e Svizzers a l'exteriur votar electronicamain dapi la votaziun a l'urna dals 27 da november 2016. Dapi l'atun 2017 han era Svizras e Svizzers che vivan en tschertas vischnancas da pilot da noss pajais questa pussaivladad.

Neuschatel

Vopna dal chantun da Neuschatel

Il chantun da Neuschatel vegn a porscher l'e-voting da La Posta a partir da la votaziun a l'urna dals 12-02-2017 sin il portal chantunal «Guichet Unique».

Turgovia

Vopna dal chantun da Turgovia

En il chantun Turgovia pon Svizras e Svizzers a l'exteriur votar electronicamain dapi la votaziun dals 23 da settember 2018.

Basilea-Citad

Vopna dal chantun da Basilea-Citad

Il chantun Basilea-Citad tira a niz il sistem da la Posta dapi la votaziun dals 10 da favrer 2019 e porscha la votaziun electronica a Svizras e Svizzers a l'exteriur ed ad umans cun in impediment. Pass per pass duain era Svizras e Svizzers che vivan en Svizra profitar da questa pussaivladad.

Son Gagl

Vopna dal chantun da Son Gagl

Il chantun da Son Gagl planisescha da trair a niz l'emprima giada il sistem da la Posta a chaschun da la votaziun chantunala dals 30 da zercladur 2019. Il sistem duai star a disposiziun a Svizras e Svizzers a l'exteriur sco er a Svizras e Svizzers che vivan en tschertas vischnancas da pilot svizras.

Glaruna

Vopna dal chantun da Glaruna

Il chantun da Glaruna è sa decidì il 2018 per il sistem da la Posta.

Grischun

Vopna dal chantun da Grischun

Il chantun Grischun planisescha da trair a niz il sistem da la Posta l'emprima giada il 2020 e vul pussibilitar da votar electronicamain tant a Svizras e Svizzers a l'exteriur sco er a Svizras e Svizzers che vivan en Svizra.

Ulteriuras infurmaziuns davart il sistem da La Posta chattais Vus sin post.ch/evoting